CIUDAD DE GUATEMALA (AFP).- “Biba Nicaragua liber!”, segun Francisco Arteaga a grita ku un moketa den laria. E ta un dje 135 prezunan polítiko nikaragwense ku a keda liberá i ku ayera a yega Guatemala.
For di un benta di un bùs, pafó dje aeropuerto di Ciudad de Guatemala, Arteaga a sonreí i a bisa di ta sinti “hopi bon” despues di su liberashon.
E prezunan polítiko a yega den un buelo den oranan di mainta na e aeropuerto La Aurora dje kapital guatemalteko, kaminda nan a keda risibí pa funshonarionan dje di gobièrnu ku kada siman ta risibí algun shen migrante guatemalteko kendenan ta keda deportá for di Merka i Mexico.
E liberashon dje prezunan polítiko keda lográ ku mediashon di Washington ku gobièrnu di Daniel Ortega, segun White House a informá.
Entre nan tin 13 miembro dje organisashon evangéliko radiká na Texas Mountain Gateway, tambe laikonan katóliko, studiantenan i otro personanan ku Ortega i su kasá Rosario Murillo, kende alabes ta visepresidente dje pais, ta konsiderá komo un menasa pa nan régimen outoritario.
Arteaga a konta ku nan a kue sera pa motibu ku el a publiká riba retnan sosial e akshonnan ku gobièrnu ta hasi kontra di iglesia katóliko.
E presidente guatemalteko, Bernardo Arévalo, a duna un bon biní na e grupo ku un mensahe riba e ret sosial X, den kua el a bisa ku Guatemala “a mustra su konvikshon demokrátiko firme, ku ta rechasá di forma rotundo e menasanan di regreshon outoritario”.
