Famianan di prezunan na Venezuela un biaha mas tabata den protesta durante fin di siman. Ademas di libertat di nan famianan, nan ta denunsiá kasonan di tortura.
BARINAS, Venezuela (AFP).- Algun shen prezu djadumingu a manifestá den un prizòn den parti wèst di Venezuela, denunsiando insidentenan di tortura di parti di outoridatnan di prizòn i a eksigí pa retirá direktor dje prizòn.
E prezunan a agrupá riba dak dje prizòn i a pone pankartanan ku mensahenan pa pida yudansa. Entre otro por a lesa “SOS”, “Nan ta torturá nos” òf “No mas tortura”. Algun dje prezunan tabatin kara kubrí.
Kolumnanan grandi di huma tabata sali for di e prizòn Internado Judicial de Barinas, ubiká na tera natal dje defuntu èks presidente Hugo Chavez, na 500 kilometer for di Caracas. E prezunan a sende diferente kos na kandela, entre kua kantidat di kolchon.
Ta konosí ku e situashon den prizòn na Venezuela ta horibel. Apesar ku den último lunanan un kantidat grandi di prezu a keda liberá, ketu bai e prizònnan ta kasi kompletamente yen.
