LONDRES, GRAN BRETANIA (AFP).- Tribunal Superior di Londres for di ayera a kuminsá eksaminá e proseso inisiá pa prens Harry kende ta reklamá ku Reino Uní di forma sistemátiko a stòp di okupá ku su seguridat ora ku e ta na e pais. E duke di Sussex, yu menor di King Charles III, i su kasá Meghan, a pèrdè e protekshon, pagá pa pagadónan di belasting, despues di a alehá su mes for dje famia real i bai biba na Merka den 2020.
E demanda di Harry ta referí na e desishon adoptá pa outoridatnan den febrüari di 2020, pa duna protekshon polisial na su persona dependiendo di e situashon den kua e ta.
Presentando e kaso, durante kua Harry mes tabata ousente, su abogado, Shaheed Fatima, a splika ku e desishon di dun’é protekshon evaluando “kaso pa kaso, ta trese dudanan grandi” pa e prens. Mas aleu e abogado a referí na e impakto di un posibel atake riba Harry, pa loke ta trata reputashon di Reino Uní, debí na “su status i su posishon den famia real”.
Den e oudiensia, e abogado di Ministerio di Interior, James Eadie, a defendé e desishon di Ravec (organisashon responsabel pa seguridat di miembronan dje famia real i otro figuranan públiko importante) di konsedé na Prens Harry protekshon “segun situashon” i “dependiendo dje konteksto” relashoná ku su biahenan den Reino Uní.
E desishon aki tin di aber ku e kambio di status ku Harry a disidí na realisá ora ku el a bira un miembro sin funshon ofisial dje famia real”, segun e abogado a agregá.
Tribunal den luna di mei a rechasá un petishon di prens Harry pa e paga for di su mes fondonan personal un protekshon polisial ora ku e ta den Reino Uní.
