Representante di “Clan del Golfo”, Luis Armando Perez Castaneda (r) i e hefe negoshadó di gobièrnu kolombiano, Alvaro Jimenez, ta interkambiá dokumento despues di a firma un “Akuerdo di Pas” na Doha dia 5 di desèmber.
BOGOTA (AFP).- “Clan del Golfo”, e organisashon prinsipal di trafikashon di droga na Colombia, lo suspendé e negosashonnan di pas na Qatar ku e gobièrnu di Gustavo Petro, komo rechaso pa e akuerdonan hasí ku Donald Trump pa ataká su lider. E organisashon responsabel pa e mayor volúmen di eksportashon di kokaina for di Colombia a protestá despues ku mandatarionan a pone prioridat na akshonnan militar i di inteligensia kontra di e hefe Chiquito Mal, durante un reunion djamars na White House.
Den kuadro dje diálogonan di pas na Doha, Petro a ekspresá na Trump e nesesidat pa ataká e lider di Clan del Golfo, segun informashon di minister di defensa, Pedro Sanchez. “Esaki lo ta un atentado kontra di buena fe i e kompromisonan” asumí te ku e momento, segun e organisashon di narkotráfiko, informando ku e ta lanta for di mesa di negosashon “provishonalmente” miéntras ku su miembro ta konsultá riba e anunsio.
“Presidente Petro a pone su interesnan personal riba interes general, ku ta e pas den e teritorionan”, segun e grupo ku ta yama su mes “Ejército Gaitanista de Colombia”.
Den luna di desèmber último Washington a designá “Clan del Golfo” komo un organisashon terorista. Ademas di Chiquito Malo, Colombia tin pelea ku Ivan Mordisco, e lider prinsipal disidente di FARC ku no a pone arma abou despues dje akuerdo di pas di 2016, i Pablito, un hòmber fuerte di gueria ELN ku ta operá na frontera ku Venezuela.
