KRALENDIJK – “E
medidanan nesesario no ta
prèt pa hende paden di e
instituto, pero pa gran partí
e detenidonan ta koperá i
ta komprondé ku ta tuma
e medidanan pa siguridat i
salú di e detenidonan mes”,
Eric Buller ta bisa. E ta bosero
di Instituto Hudisial
Hulanda Karibense (JICN).
Ya pa algun dia prizòn
ta den publisidat pa motibu
di brote di kontagio di
COVID-19. Pa basta luna
mando di JICN a implementá
medidanan riguroso
ku e meta pa mantené e
vírus pafó di muraya di e
instituto. Pa un periodo
basta largu esaki a logra.
Lamentablemente awor
a bin kambio den e situashon.
“Gerente di JICN ta
den kontakto estrecho ku e
departamento di Salubridat
Públiko di Entidat Públiko
i tin e situashon bou di kòntròl”,
Buller ta garantisá.

Kontagio
Riba djamars 4 di
yanüari JICN tabatin 4
detenido i 2 kolaboradó
ku a tèst positivo pa COVID-
19. E dia aki tabatin
algun kolaboradó mas ku
tabata warda riba resultado
di nan tèst, pues miéntras
tantu e sifranan di kontagio
por a kambia i oumentá.
BONERIANO a publiká
un artíkulo den kua un persona
ku a aserká nos medio
di komunikashon ta splika
ku e situashon den prizòn
ta preokupante. Ademas e
fuente ta denunsiá e echo
ku mando di e instituto no
ta kargando responsabilidat
i tuma medida pa e oumento
drástiko di kaso di
Covid.
Buller ta enfatisá ku
JICN tin un protokòl interno
i nan servisio médiko
ta monitoria salu di e personanan
segun esaki. “E
detenidonan tin keho leve
i kada detenido ta den isolashon
den sèl apart”, e ta
splika.
Preshon
Den un kombersashon
anterior ku Wibo de Vries,
e direktor di JICN, el a splika
ku na momentu ku un
kolaboradó ta den karentena
ta surgi èkstra preshon
di trabou. “Esaki ta un organisashon
ku ta drai 24
ora. Nos no por sera porta
i bai kas”, el a splika.
Tin ku remarká ku segun
e sifranan ku de Wibo
de Vries a duna, durante e
krísis di corona 25 empleado
di JICN a kontagiá ku e
vírus. Awor un bia mas tin
empleado kontagiá. Esaki
ta un situashon difísil ku
basta instansia ta enfrentá.
Algun instansia ta hasi
uso di tèst ku bo mes por
hasi ku e meta pa detektá
e vírus na tempu, pa por
evitá un brote.
Nos a komprondé di
Buller ku JICN no ta hasi
uso di esaki. “No, JICN
no ta suministrá tèst ku bo
mes por hasi na so kolaboradónan.
Si tin keho nan
mester laga tèst na e departamento
di Salubridat
Públiko”, e ta splika. Ta
interesante pa sa kuantu
kolaboradó di JICN ta bakuná.
Nos a komprondé
di Buller ku JICN no ta
atministrá kuantu kolaboradó
ta bakuná.
Sí tin posibilidat den
prizòn pa detenidonan bakuná.
Na e momentu aki
tin mas ku 50% di tur detenido
bakuná.

LAGA UN KOMENTARIO

Please enter your comment!
Please enter your name here