Trahadónan di un hospital den Bunia, parti ost di Congo, ta karga un kaha di morto di un persona di kual tin sospecho ku el a muri di ébola.
GENEVE (AFP).- Repúblika Demokrátiko di Congo ta konfrontando un epidemia di ébola “ekstremadamente grave i difísil”, segun ta keda alertá pa e direktor di Organisashon Mundial di Salú (OMS), Tedros Adhanom Ghebreyesus. E direktor a hasi un yamada riba paisnan bisiña pa aktua “awor dirèkt”.
“Nos ta intensifikando e operashonnan ku karakter di urgensia, pero pa e momento aki e epidemia ta avansá mas lihé ku nos”, segun e hefe di OMS.
“E paisnan ku ta kompartí frontera ku Congo ta den hopi riesgo i nan mester aktua di inmediato”, segun Tedros, ku tin intenshon di biaha awe pa Congo. Dies pais afrikano ta den riesgo pa ébola, ademas di Congo i Uganda, segun CDC, ku ta e agensia di salubridat di Union Afrikano.
Congo a dekretá un epidemia di ébola dia di 15 di mei kousá pa ”Bundibugyo”. Siman pasá OMS a elevá e nivel di riesgo for di “haltu” pa “hopi haltu”.
Tedros a trese dilanti ku tin 101 kaso konfirmá na Congo, ku dies morto, pero ku e magnitut dje epidemia ta mas grandi i a referí na 900 posibel kaso i 220 morto sospechoso.
Deskonfiansa
Ébola ta un enfermedat viral mortal ku ta keda transmití pa kontaktonan dirèkt ku líkido di kurpa. E por provoká keintura ku sakamentu i fayo di órganonan den kurpa. E vírùs akí a mata mas ku 15.000 persona den Afrika den último 50 añanan, ku un mortalidat di entre 25% i 90%, segun OM, pero ta ménos kontagioso kompará ku covid i sarampi.
E provinsianan oriental di e pais, kaminda a detektá e brote pa promé biaha, “ta hopi insigur, ku un deskonfiansa grandi den outoridatnan di parti dje poblashon lokal”, segun a keda trese dilanti.
Na esaki mester agregá e echo ku no ta eksistí “bakunanan aprobá ni tratamentu pa Bundibugyo, kousante dje brote aktual di ébola.
Un grupo di persona djadumingu a fòrsa drenta den un hospital den Mongbwalu pa por a bai ku kurpa di un lider religioso ku a muri di ébola, segun outoridatnan. E pashènt ku a fayesé tabata un lider religioso hopi konosí. Sòldatnan mester a intervení i tira den laira pa kore ku e multitut, segun e fuente a indiká.
