Situashon ta sigui preokupante
WILLEMSTAD – Ayera atrobe, awor den bisindario di Kaya Natan otro insidente ku kachónan di kaya na momentu ku 3 kachó a ataka un peaton. Un situashon ku ta sigui di preokupashon. Segun informashon, e víktima no a keda morde pa e kachónan pero pa motibu di e atake a kai dal su kabes i risibí un kap ku tabata basha basta sanger. Ta polis a yega na e sitio pa duna e hòmber promé asistensia i transporte pa un sitio mas sigur pa tuma informashon di e insidente.
Lamentablemente no ta un kaso aislá ya ku ainda no por haña un formulá pa atendé ku tantu kachó ku ta kana los riba kaya. E situashon aki ta bolbe enfatisá e problema di kachónan bandoná na Kòrsou ku ta sigui krese i mester atenshon urgente.
Den diferente bario i na vários sitio públiko, tin grupo di kachó ku ta kana i den algun kaso forma peliger. Hopi biaha e animalnan ta mansu pero tin momentonan kaminda nan por bira agresivo, spesialmente ora nan ta den grupo, ora nan ta sinti nan mes menasa òf ora nan ta buska kuminda.
Pa peaton, mucha nan ku ta hunga den kaya, hende mayor i tur persona ku ta hasi ehersisio, e situashon aki por bira un peliger real. Atakenan por kousa heridanan serio manera tabata e kaso ayera, trauma i tambe gastunan médiko ku por evitá.
E tema no ta solamente tokante seguridat públiko, pero tambe tokante bienestar animal. Hopi di e kachónan aki a wòrdu bandoná, no tin doño responsabel. Kachónan no ta sterilisá i no ta risibí kuido nesesario. Esaki ta kontribuí na reprodukshon deskontrolá i mas kachó riba kaya.
A pasa un lei di animal pero solushon pa e problema aki ta pidi un esfuerso konhunto. Gobièrnu, organisashonnan di protekshon animal, veterinario nan i komunidat mester traha huntu.
Tambe e komunidat tin un papel importante. Ora un hende mira un kachó agresivo òf un grupo ku ta pone peliger, e mester report’é na instansianan konserní pa por tuma akshon promé ku algu mas serio sosodé.
(Foto File)
