WILLEMSTAD.- E kontrato ku Refineria di Kòrsou (RdK) a firma ku Global Oil ta primordial pa produkshon di utilidat, esta awa, koriente, bapor i airu komprimí. Esaki den kuadro di e proseso pa RdK haña un operadó nobo pa Refineria Isla.
Un proseso ku entretantu gobièrnu a atmití ku no ta persiguí mas, esta pa haña un operadó nobo pa e refineria. E promé ophetivo menshoná den e kontrato ku EXTRA a lesa, ta pues pa Global Oil produsí utilidat. Na di dos lugá ta menshoná pa produsí tambe asfalt, “pitch” i otro produktonan ku e kompania por bende.
E lista di instalashonnan ku Global Oil ta tuma bou di su maneho pa produkshon awa, elektrisidat, bapor i airu komprimí ta largu. Ta trata entre otro di e turbinanan di gas number 9 i 10 ku ta hustamente e turbinanan ku tin diskushon riba dje riba loke Global Oil ta kobra Aqualectra pa hasi uso di esakinan komo kapasidat di reserva.
Tambe Global Oil tin maneho riba 3 planta di “reverse osmosis” ku ta plantanan pa produkshon di awa. Tankinan di awa, “waste heat boilers”, “liquid fuel oil system”, “low” i “high pressure fuel gas system”, “steam distribution system”, 2 “air compressor”, un “salt water pump house” i sistemanan pa pòmp awa pa fria e instalashonnan.
E akuerdo entre RdK i Global Oil ta pa un periodo inisial di 60 luna (5 aña) ku e posibilidat pa prolongá esaki ku 2 biaha 120 luna (10 aña) mas. Pues Global Oil a base di e kontrato aki por keda operá e instalashonnan di produkshon di utilidat i pa produsí asfalt pa un periodo di 25 aña.
Segun e akuerdo ku a drenta na vigor efektivamente na yüli 2023, Global Oil mester hasi un invershon segun kalkulashon di 25 mion dòler durante un periodo di 9 luna pa asina eliminá retrasonan den mantenshon di e instalashonnan. Pa por produsí produkto despues di e 9 lunanan inisial aki Global Oil mester paga tur luna un un suma di 500 mil dòler na refineria di Kòrsou, kual suma ta someté na indeksashon tur aña yanüari.
Entretantu RdK a informá ku e planifikashon pa hasi mantenshon di e instalashonnan a surgi retraso. Banda di e akuerdo pa operá i mantené e instalashonnan i produsí utilidat i produkto RdK a firma un akuerdo mas ku Global Oil riba kantidat di servisio ku RdK ta entregá na Global oil kontra pago.
Ta trata entre otro di servisionan pa paga kandela, mantenshon di pir i terminal, pèrmitnan i laboratorio. Den esaki sinembargo no a tene kuenta pa inkluí Aqualectra pa e kompania tambe firma un kontrato apart pa palabrá tarifanan pa uso di e instalashonnan di utilidat ora ku tin falta di kapasidat, tin un black out pa kualke motibu òf tin mashin di produkshon di koriente ku tin ku ba den revishon.
Segun direktor interino di RdK, Patrick Newton ta skibi den un karta pa Konseho di Minister fechá 5 yüli 2024 RdK no tabata na altura ku Aqualectra ta usa e turbinanan di gas pa kapasidat di reserva.
