WILLEMSTAD.- Epidemiólogo dr. Iralice Jansen ta presidente di un grupo di trabou ku gobièrnu di Kòrsou a instalá pa hasi tur loke ta trata e trayekto di bakunashon na Kòrsou. Den e grupo tin diferente sientífiko, botikario, spesialista di komunikashon i informashon, tambe epidemiólogonan i hendenan ku ta spesialisá den investigashon. Banda di esei tin personanan ku ta spesialisá den fiansa. Tambe representantenan di e siguiente grupo ta den e grupo di trabou: salubridat hubenil, dòkter di kas, infectieziektebestrijding, hurista i representante for di tim stratégiko di COVID-19, logístiko, maneho di karisia i siguridat. Manera ta konosí Kòrsou lo haña e promé bakunanan riba término kòrtiku. Frizernan spesial pa warda e bakunanan a yega Kòrsou e siman aki kaba. E promé bakunashon ku Kòrsou lo haña ta di e kompania Pfizer. Hulanda ta manda e bakuna Kòrsou. Bakuna di Pfizer mester ser wardá na -80 grado.
Minister Zita Jesus-Leito di Salubridat, medio Ambiente i Naturalesa a bisa ku Hulanda ta paga pa e bakunashon.
Jansen djamars último durante konferensia di prensa di gobièrnu di Kòrsou a bisa ku e bakunanan ku Kòrsou ta bai haña lo ser duná na personanan den grupo di riesgo; pa motibu ku Kòrsou lo no haña sufisiente bakuna pa henter poblashon. Pa kolmo, Jansen a splika ku niun di e bakunanan kontra COVID-19 te ainda no a wòrdu di tèst riba hóben bou di 16 aña, ni riba hende muhé ku ta na estado. Te e momentu ku e bakuna ta wòrdu di tèst riba e dos gruponan, hóbennan i hende muhé na estado na Kòrsou lo no haña niun tipo di bakuna.
Segun Jansen e promé bakuna lo ser usá pa e grupo vulnerabel. Pero segun Jansen mester sòru tambe ku e kuido por sigui. Pues personanan riba 60 aña, ku ta un kantidat di 39.478 persona, tambe esnan di 18 aña i mas ku tin malesa króniko, ku ta mas o ménos 27.500 hende. I trahadónan den kuido ku ta 3500 persona ta den e promé grupo.
Jansen a splika djamars último ku e proyekto di bakunashon no kier men ku nos, komo komunidat, ta kla. Segun e epidemiólogo nos mester kumpli ku nos parti, manera usa tapaboka, tene distansia sosial i sigui laba man. Segun Jansen lamentablemente e proyekto di bakunashon no ta nifiká ku nos por bai bèk na e situashon normal.

LAGA UN KOMENTARIO

Please enter your comment!
Please enter your name here