Kardinalnan ta asistí na un sakrifisio di misa promé ku elekshon di un Papa nobo den Basilika St. Peter den Vatikano.
SIUDAT DI VATIKANO.- Promé votashon, huma pretu: e kardinalnan ayera no a yega na un akuerdo riba e susesor di papa Francisco i nan lo keda aislá di mundu te ora ku un nòmber logra haña por lo ménos 89 di e 133 votonan.
Den kareda di 50.000 hende tabata riba plasa San Pedro di Vatikano i a mira huma pretu sali for di e chiminea chikí ubiká riba dak di Kapia Sixtina kaminda e proseso ta tuma lugá.
No tabata un sorpresa. Tabata spera kaba ku e elekshon lo a eksigí mas negoshashon i vários votashon pa yega na un nòmber di konsenso entre e “bergoglistanan” di Francisco i e ala mas konservador ku tabatin hopi krítika riba e pontifikado reformista dje promé papa latinoamerikano kende tabata enfoká riba pobernan.
E promé votashon a bira konosí despues di tres ora i 15 minüt despues dje “extra omnes”, e órden di “tur hende afó” pa e “prensnan di iglesia” reuní i kuminsá ku e ritual akí ku ta data for di edat mediano. E aña’kí no tin gran faboritonan.
E 133 kardinalnan ku por vota, tur bou di 80 aña, a keda aislá di mundu, sin akseso na internèt, telefòn, televishon òf prensa, te ora ku nan skohe un pontífise nobo.
E italiano, Pietro Parolin, e kardinal di mas edat i kende tin derechi di voto, a liderá e invokashon latino dje Spiritu Santu: “Veni, Creator Spiritus”.
Kuminsando awe e kardinalnan lo vota kuater biaha: dos biaha den oranan di mainta i dos biaha atardi.
