Promé Minister britániko, Keir Starmer, kende no tin ni e mínimo intenshon pa entregá su retiro.
GRAN BRETANIA (AFP).- E promé minister britániko, Keir Starmer, bou di preshon despues di retiro di su hefe di gabinete i tambe su direktor di komunikashon, a bisa ayera di “lo no renunsiá”. Esaki despues ku un miembro di su partido a pidié pa entregá retiro pa motibu dje relashon di su èks-embahador na Merka ku e defuntu delinkuente seksual Jeffrey Epstein.
E gobièrnu di Starmer ta den un krísis profundo despues di e último revelashonnan riba e relashonnan entre Epstein i e èks-embahador britániko na Washington, Peter Mandelson, nombrá pa su gobièrnu.
“Despues di a lucha asina duru pa e posibilidat di kambia nos pais, mi no ta dispuesto na renunsiá mi mandato i tampoko mi responsabilidat”, segun e promé minister a bisa ayera na diputadonan laborista den un reunion, kaminda el a keda risibí ku aplouso. Starmer a parse di ta desafiante insistiendo ku “m’a gana kada bataya ku m’a bringa”. Sinembargo, bosnan den su gobièrnu reklamando su retiro ta krese, i e lider di Partido Laborista eskoses, Anas Sarward, djaluna a pidi e promé minister pa entregá su retiro. “Mester pone fin na e tema di distrakshon, e direkshon di Downing Street mester kambia”, segun Sarwar a deklará. Despues dje ofensiva di Sarwar, Downing Street a insistí ku e promé minister, na e funshon for di yüli di 2024, lo kumpli ku “un mandato di sinku aña otorgá di parti di pueblo britániko pa hasi e kambionan nesesario”.
Vários minister di e gabinete a mustra nan desakuerdo ku Sarwar, manera e Minister di Finansa, Rachel Reeves; esun di Relashonnan Eksterior, Yvette Cooper; esun di Hustisia, David Lammy i esun di Interior, Shabana Mahmood, kende nan a ekspresá nan apoyo na e hefe dje gabinete.
Pero e lider laborista a sufri otro derota ayera ku e retiro di Tim Allan, su direktor di komunikashon.
