GROENLAND, Dinamarka.- E promé minister danes, Mette Frederiksen, a reuní ayera ku konduktornan di partidonan polítiko danes pa informá nan di “medidanan adoptá” despues di deklarashonnan dje presidente eligí di Merka, Donald Trump, di aneksá Groenland, loke a kousa sorpresa i septisismo entre lidernan europeo.
Trump, kende lo asumí presidensia dia 20 di yanüari, a kousa un situashon di inkredulidat djamars na Dinamarka ora ku el a papia di su intenshonnan di aneksá e teritorio outónomo danes, sin deskartá un intervenshon militar.
Trump for di kabamentu di 2024 a referí na su intenshonnan di ekspanshon, segurando ku e kontròl di Groenland lo ta “un nesesidat apsoluto” pa “seguridat nashonal di Merka i libertat di hinter mundu”.
Den e konteksto ei, e promé minister danes a disidí na reuní e hefenan di partidonan representá den parlamento danes.
“Reuniendo ku e hefenan di partido ta permití pa nos kompartí e medidanan ku gobièrnu a adoptá den último dianan”, segun e minister di Relashonnan Eksterior, Lars Løkke
Rasmussen, na periodistanan.
Dinamarka no ta den un “krísis diplomátiko”, pero esei no ta nifiká “ku no por tin un… si e palabranan transformá den aktonan”, segun e minister.
“Mi ta kere ku mester tuma Trump hopi na serio, pero no nesesariamente kada palabra ku el a ekspresá”, el a agregá
Donald Trump ya a pone wowo riba Groenland den 2019 durante su promé mandato (2017-2021), afirmando di ke kumpra e teritorio, un proposishon ku e promé minister danes a kalifiká komo “apsurdo”.
Groenland, di 57.000 habitante, ta buska pa gana soberania pero ta sigui dependé finansieramente di Dinamarka.
E teritorio, kaminda Merka tin un base militar, ta konta ku reservanan enorme di mineral i petrolio sin ku nan a keda eksplotá.