COLOMBO, SRI LANKA, AFP.- Promé minister di Sri Lanka, Mahinda Rajapaksa a renunsiá despues ku desénas di persona mester a wòrdu hospitalisá dor ku su sostenedónan a ataká manifestantenan.

E pais a sufri vários luna di blackout i skarsedat grave di kuminda, gasolin i medisina i ta pasando den su krísis ekonómiko di mas pió desde su independensia. Manifestantenan a protestá durante vários siman kontra gobièrnu den e pais.

Rajapaksa su bosero, Rohan Weliwita a bisa ku e premier di 76 aña a manda su karta pa su ruman hòmber, Presidente Gotabaya Rajapaksa habriendo kaminda pa “un unidat nobo di gobièrnu”.

E pais su partido opositor di mas grandi a bisa promé ku e riot ku lo no uni gobièrnu si esaki ta kontené miembronan di e famia di Rajapaksa. E renunsia di e promé minister ta nifiká ku outomátikamente ta disolvé e gabinete.

Polis a tira gas lakrimógeno i spùit awa riba tur manifestante, despues ku sostenedónan di e famia Rajapaksa a ataká esnan ku tabata protestá kontra gobièrnu. Alrededor di 78 persona a keda hospitalisá, segun indikashon di bosero di Hospital Nashonal Colombo, Pushpa Soysa.

LAGA UN KOMENTARIO

Please enter your comment!
Please enter your name here