ATHENS, GRESIA, AFP.- Promé minister griego, Kyriakos Mitsotakis, a bisa djamars ku elekshon general lo tuma lugá den mei, ya ku e gobièrnu ta enfrentando hopi krítika pa un desaster ku a mata 57 persona den febrüari.

E mandato di e gobièrnu konservador ta ekspirá na komienso di yüli.

Segun medionan lokal, elekshon mester a tuma lugá den aprel, pero e dalmentu entre dos trein, e aksidente di riel di mas pió den historia di Gresia, a sorprendé e nashon i provoká un kambio di plan.

E desaster di trein a provoká vários siman di protesta, tin ora violento i tabata un gòlpi fuerte pa e promé minister Kyriakos Mitsotakis i su gobièrnu promé ku elekshon.

E minister di Transporte di Gresia a renunsia despues di e desaster, miéntras ku e hefe di e stashon ku tabata den servisio na momentu di e aksidente i tres funshonario mas a keda akusá i posiblemente ta enfrentá bida largu den prizòn.

 

LAGA UN KOMENTARIO

Please enter your comment!
Please enter your name here