JARTUM, SUDAN, AFP.- Abdala Hamdok a bolbe bira premier di Sudan despues di un golpe di Estado un luna pasá. A logra firma un akuerdo ku general Abdel Fattah al Burhan, pero e protestanan riba kaya a kontinuá apesar di esaki, kaminda un adolesente a muri.
Hamdok i general Burhan, outor di e gòlpi militar di 25 di òktober a firma un akuerdo pa kompartí poder i a primintí ku lo kontinuá ku e proseso di transishon di gobièrnu. Nan a reuní den Palasio Presidensial.
E pakto ta nan kontesta na e kondishonnan di e komunidat internashonal. Pero Nashonnan Uní a atvertí repetidamente ku “tur parti mester aktua di forma konstruktivo i ku buena fe pa restourá òrdu konstitushonal i di transishon” den Sudan.
Apesar di e akuerdo, e protestanan no a para. Un hóben di 16 aña a muri den bario di Omburman djadumingu i desde e golpe militar e protestanan a laga 41 morto i sentenáres di herido.
Apesar di e represhon, míles di manifestante a sali riba kaya pa protestá na Jartum, Kasala, Puerto di Sudan i Atbara. Forsanan di òrdu a tira gas lakrimógeno riba e manifestantenan dilanti e palasio presidensial den e kapital, segun indikashon di un periodista di AFP.
