…Aktivistanan di Partido Komunista di India den un protesta na Hyderabad kontra di gobiernu di Merka i presidente Donald Trump…
WASHINGTON, USA (AFP).- E promé minister di India, Narendra Modi, ayera a purba na evitá un guera komersial ku e presidente norteamerikano Donald Trump durante di un reunion na White House, oranan despues ku e republikano a anunsiá ku meskos ku India a hasi, e tambe lo bin ku belasting pa paisnan aliado i rivalnan.
Trump a trese dilanti di ta spera “akuerdonan komersial maravioso” ku India, na komienso dje enkuentro den presensia di Elon Musk, kende ta su asesor. El a menshoná e kompra di petroli i di gas norteamerikano.
Narendra Modi a duna di konosé di ta sinti “e mesun konfiansa i e mesun entusiasmo” ku tabata e kaso durante e promé mandato di Trump (2017-2021), marká pa un relashon amistoso entre e dos lidernan.
“Tradishonalmente India ta e pais ku tin e belasting di duana mas haltu”, segun e multimionario republikano a lamentá den e reunion. “Nos lo papia di esei”.
E bishita di Modi na Washington a kuminsá ku un enkuentro ku Musk, e hòmber mas riku na mundu i konsehero di Trump pa kòrta den gastunan federal.
E promé minister indio a publiká potrèt di nan dos dunando otro man, den presensia di yunan dje mionario.
Segun funshonarionan di White House, Trump i Modi lo purba haña un akuerdo komersial “hustu” entre nan paisnan.
Promé ku e biahe, Modi a hasi algun konseshon redusiendo belasting di importashon riba motosaikel, loke a benefisiá Harley-Davidson.
Tambe siman pasá el a aseptá un buelo militar norteamerikano ku a transportá 100 migrante di bui komo parti dje kampaña anti migratorio di Trump
