HERUSALEM, INDEFINI, AFP.- Promé minister israelí, Naftali Bennett, a anunsiá “fin” di e pasport di vakuna djaweps atardi, indikando ku e ola di infekshon vinkulá ku e variante di omicron a baha rápidamente den Israel.
“Nos ta poniendo fin na e uso di “pasport bèrdè”, manera ta yam’é na Israel, mirando ku e ola di omicron ta bahando”. Outoridatnan a konstatá un kaida fuerte den e kantidat di personanan ku ta desaroyá síntomanan grave di covid, segun indikashon di Bennett den un komunikado, despues di un reunion ku funshonarionan di salubridat públiko di Israel.
Na komienso di febrüari, gobièrnu di Israel a indiká ku a eliminá e obligashon di ‘pasport bèrdè’ pa haña akseso na tur kafetaria, restorant, bar, sentronan deportivo i tambe hotèl. Gobièrnu a mantené e pasport pa otro sitionan manera salanan di konsierto i sinenan.
E siman aki, míles di israelí a protestá den Herusalèm pa manifestá kontra e restrikshonnan di salubridat vinkulá ku e pandemia, siguiendo e inisiativa di Canada.
Israel tabata un di e promé Estadonan ku a lansa un gran kampaña di vakunashon den desèmber 2020, despues di un akuerdo ku Pfizer. Aktualmente, kasi mitar di e pueblo a haña tres dósis di e vakuna aki, kual segun outoridatnan a kontribuí ku e kantidat abou di hospitalisashon durante e ola di omicron.
