…Promé Minister canades, Justin Trudeau…
OTTAWA, Canada (AFP).- E promé minister kanades, Justin Trudeau, a bisa ayera ku e presidente norteamerikano, Donald Trump, ta buska pa “suak ekonomia kanades” pa despues “papia di anekshon” dje pais.
Den e konteksto akí, “mi no sa ki tipo di negoshashon nos por tin ku Merka”, segun e hefe di gobièrnu kanades. Trudeau a agregá ku “e preteksto di ingreso di fentanilo via di fronteranan, ku Trump a usa pa hustifiká belasting kontra di Canada, ta kompletamente no hustifiká”.
Merka a lansa “un guera komersial” i Canada “lo no bèk”, segun e promé minister, poko ora despues ku a drenta na vigor e medidanan di duana di Donald Trump.
Trudeau a trese dilanti ku ta trata di un desishon ‘‘estupido” di parti dje presidente norteamerikano i a asentuá ku nada ta hustifiká e medidanan ei.
Produktonan importá for di Canada i Mexico, ku ta sosionan di Merka den e akuerdo di komersio liber di Nort Amérika, lo tin belasting di importashon di 25%. Den kaso di China, e subida ta 20% adishonal na loke tin kaba.
Trump a preshoná ku e belasting pa Canada i Mexico oumentá nan vigilansia na fronteranan. Tur dos pais den último lunanan a tuma medidanan, pero esakinan no na satisfakshon dje magnate republikano.
Poko promé ku e ‘deadline’ pa yega na un entendimentu, e magnate republikano a deklará ku no tin márgen di maniobra pa evitá belastingnan ku el a imponé inisialmente dia 3 di febrüari, promé di a posponé esakinan pa un luna pa por buska solushon na problemanan migratorio i entrada di droga na Merka.
E belastingnan lo afektá pa mas di 918.000 mion dòler na importashon merikano di Canada i Mexico. E dos paisnan akí huntu ku China, a anunsiá medidanan di represaya.
