HERUSALEM, AP.- E promé minister palestino Mohammad Shtayyeh a kritiká un proposishon di pas di Donald Trump su gobièrnu promé ku su anunsio formal e siman aki. El a indiká ku e anunsio “no ta un base pa resolvé konflikto” den Medio Oriente.
E funshonario a papia ku su gabinete miéntras e promé minister israelí Benjamin Netanyahu a bishita Washington pa e anunsio di presidente Trump su plan pa resolvé e konflikto palestino-israelí.
Shtayyeh a bisa ku e plan ta violá e lei internashonal i “ta bini di un parti ku a pèrdè su kredibilidat pa fungi komo un mediadó di pas honesto den un proseso polítiko serio i genuino”.
Ainda e palestinonan no a mira e plan, pero el a wòrdu rechasá kaba, argumentando ku e gobièrnu di Trump ta na fabor di Israel.
Trump a dal vários stap ku a kousa malkontentu entre e palestinonan den añanan resien. E presidente a rekonosé e siudat di Herusalèm komo kapital di Israel i a muda e embahada di Merka pa e siudat aki, i a asta sera su ofisinanan diplomátiko palestino na Washington i a kòrta tur fondo di programanan di yudansa pa e palestinonan.
