BRATISLAVE (AFP).- E promé minister slovako, Robert Fico, ta den estado krítiko i su bida ta kore peliger despues di a keda tirá ayera den un intento di asesinato, un atake ku a keda fuertemente kondená pa komunidat internashonal. Dòkternan ayera nochi tabata den sala di operashon luchando pa salba bida dje dirigente ku a keda tirá den un insidente ku e vise promé minister, Robert Kalinik, a kalifiká di “atake polítiko”.
“Nos a risibí informashon dje dòkternan ku ta bisa ku e promé minister ta den kondishon krítiko i ku su bida ta kore peliger”, segun e minister di interior, Matus Sutaj Estok, na periodistanan den e hòspital dje siudat di Banska Bystrica.
E presidente slovako, Zuzana Caputova, a anunsiá den un komunikado ku “polis a detené e atakante” i ku despues lo duna mas informashon.
Imágennan ku a pasa na televishon ta mustra un hòmber drumí abou na suela ku mannan di boei.
Fico, lider populista akusá di ta simpatisá ku Kremlin, a risibí vários tiru.
Segun medionan di komunikashon lokal, e sospechoso dje atake ta un eskritor di 71 aña.
“Mi no tin ni e menor idea di kiko mi tata tabata pensando, di loke el a plania ni dje motibu”, segun yu dje sospechoso a duna di konosé.
