STOCKHOLM, SUESIA, AFP.- E promé minister sueko, Stefan Lofven, a presentá su renunsia djaluna, un siman despues ku el a pèrdè durante un moshon di sensura. E presidente di Parlamento ta enkargá ku e tarea pa haña un promé minister nobo.

E lider a haña te djaluna pa anunsiá su desishon, i a deskartá e opshon alternativo pa organisá elekshon antisipá.

“Mirando e situashon eksepshonal ku e pais ta aden, ku un pandemia i e retonan ku esaki ta trese kuné, elekshon antisipá no ta un opshon pa Suesia”, asina Lofven a deklará den un rueda di prensa.

Lofven ta e promé premier ku ta pèrdè kontra un moshon di sensura. Partido Demókratanan di Suesia a presentá e moshon, respaldá pa Partido Moderá i Demókratanan Kristian ku 181 voto, di 349 asiento.

Despues di 11 moshon di sensura den historia polítiko moderno di Suesia, Lofven a marka un presedente, apesar ku el a sobreviví vários krísis polítiko.

 

LAGA UN KOMENTARIO

Please enter your comment!
Please enter your name here