CARACAS (AFP).- “Edmundo presidente!”, tabata e kanto di sentenáres di militante di oposishon di Venezuela ku a akudí na e promé reunion di kampaña dje kandidato deskonosí ku lo enfrentá e presidente Nicolás Maduro den elekshonnan di 28 di yüli.
Edmundo González Urrutia, un diplomátiko di 74 aña, a keda designá pa e koalishon Plataforma Unitaria Democrática (PUD) komo kandidato despues ku Korte a prohibí kandidatura di Maria Corina Machado i e veto pa e promé opshon pa sustituí esaki, Corina Yoris.
“Nos kompromiso ta e rekonsiliashon di venezolanonan”, segun González a bisa den un akto organisá pa e partido Encuentro Ciudadano (EC), ku ta forma parti dje aliansa. “Nos lo promové diálogo i komprenshon, i nos lo resolvé e diferensianan relashoná ku esaki. “Nos lo traha uní pa un pais den pas i armonia. E rekonsiliashon ta un promesa, e ta un akshon, e ta un kaminda ku nos lo kana huntu”, segun el a asentuá.
González Urrutia a keda presentá komo “e próksimo presidente di Venezuela”, di parti dje presidente di EC, Delsa Solórzano, i Machado a kalentá e sala ku su manera di semper.
“Esaki ta e anhelo ku ta uni nos, e kompromiso ku nos ta asumí”, segun Machado, kende a bari den e pre-elekshonnan di PUD den òktober último. “I bosnan tin e seguridat ku nos ta bai gana ku Edmundo” i “nos ta bai logra pa start e proseso maravioso di transmishon”.
Machado ta esun konsiderá komo alma di kampaña di oposishon, rekoriendo hinter e pais den reunionnan den kua e ta promové González ku un bòrchi grandi ku esaki su potrèt ariba.
Pa djasabra awor, tur dos tin programá e promé presentashon grandi den La Victoria, siudat natal dje diplomátiko na 95 km den outo for di Caracas.
