CARACAS, VENEZUELA, AFP.- E tankero Fortune, e promé di sinku barku iraní ku ta trese gasolin i produktonan derivá, a ankra na e puerto di refineria El Palito, segun informashon di e minister di Petroli, Tareck El Aissami.
E minister a publiká imágen di e tankero riba Twitter, kual a drenta teritorio venezolano djasabra anochi, eskoltá pa barku di Forsa Armá Bolivariano di Venezuela (FANB). Un segundo barku tambe a drenta Venezuela.
E yegada di e barkunan na Venezuela ta sosodé meimei di un skarsedat profundo di gasolin, kual a sigui bira mas grave durante e karentena dekretá pa e pandemia di COVID-19 desde 16 di mart último. E pais ta sperando yegada di tres barku mas. E flota ta transportá 1,5 mion bari di gasolin, segun indikashon di prensa.