Victoria McCloud, wes transseksual di Reino Uní.
LONDRES.- E promé wes trans di Reino Uní a anunsiá ku lo e denunsiá gobièrnu britániko dilanti Tribunal Europeo di Derechinan Humano (TEDH) pa e polítika riba derechonan despues di un veredikto di Supreme Court.
Victoria McCloud, un wes penshoná di Tribunal Superior di Hustisia, a anunsiá ku lo e presentá “un òf mas kaso” kontra e gobièrnu di promé minister Keir Starmer, kende el a akusá di a violá Konvenshon Europeo di Derechinan Humano.
Na kuminsamentu di aprel, Tribunal Supremo di Reino Uní a diktaminá ku e palabranan “muhé” i “sekso” mester keda interpretá solamente den sentido biológiko.
Gobièrnu a bai di akuerdo ku e veredikto i a disidí ku muhénan trans mester usa tualèt i kamerinnan di hòmber, i vise vèrsa. E reguladó britániko enkargá ku temanan di igualdat a manifestá su mes den e mesun sentido.
McCloud a indiká na AFP den un komunikado ku e fayo i e respuesta ofisial “ta un infrakshon grave di derechinan di Konseho di Siudadanonan di Union Europeo i Reino Uní, inkluso den relashon ku sekso, orientashon seksual i privasidat”.
“Ta mi firme intenshon pa reafirmá mi derechinan den virtut dje konvenshon i otro derechinan”, el a agregá.
E desishon di Tribunal Supremo dia 16 di aprel a determiná ku e términonan “muhé” i “sekso” den e lei di igualdat di 2010 ta referí na un muhé biológiko i na sekso biológiko.
