Sostenedónan dje kandidato presidensial kolombiano, Abelardo de la Espriella, ekspresando nan sosten na e kandidato. Su kontrinkante Iván Cepeda ta konta ku sosten di aktual presidente Petro.
BOGOTA, Colombia (AFP).- Ayera un kongresista na Colombia a presentá un proposishon pa suspendé e presidente Gustavo Petro pa motibu di a partisipá di forma supuestamente ilegal den e kampaña pa elekshon, ku lo disidí e kontinuashon di iskierda na poder. E mandatario iskierdista a bin ta aktivo na fabor di su aliado Iván Cepeda, ku dia 21 di yüni lo enfrentá e ultraderecha Abelardo de la Espriella. E kongresista Gloria Arizabaleta, di parti di gobièrnu, a presentá un dokumento den kua e ta deklará e “suspenshon” dje presidente, kontra ken tin un investigashon di parti di Komishon di Akusashon di Parlamento pa su supuesto metementu den e kampaña.
Aunke medionan di prensa a reportá e suspenshon di Petro, kongresistanan, ekspertonan i ministernan ta nenga ku ta trata di un desishon ku balides hurídiko. E minister di Interior, Armando Benedetti, a rekordá riba X ku “solamente Senado” tin e fakultatnan legal pa suspendé presidente den e pais. “E Komishon di Akusashon no por suspendé e Presidente di e Repúblika, i ménos pa motibu di deseo di un representante”, segun e man drechi dje mandatario a agregá. Den e mesun sentido ei a bin un reakshon dje Minister di Hustisia, Jorge Iván Cuervo: “e proyekto mester keda aprobá òf rechasá pa e komishon, i den kaso di keda aprobá, plenaria di Kámara ta manda e kaso pa Senado”.
Pero den un deklarashon na prensa na New York a bisa ku ta “simplemente” un “pretenshon” pa suspendé i a bagatelisá un efekto real dje dokumento.
E presidente no solamente a ekspresá di forma habrí su apoyo na Cepeda, pero tambe el a kritiká e apoyo dje presidente merikano Donald Trump na De la Espriella, un abogado mionario ku tin rechaso pa e mandatario iskierdista.
