Prostitushon pa sèn tambe na trabou di kolega ku kolega

5287

WILLEMSTAD.- Tin hopi hende ta prostituí pa haña sèn i esaki ta sosodé na trabou tambe kaminda kolega ta drumi ku otro pa motibunan finansiero. Den kuadro di selebrashon di Optima Arbodienst su di 10 aña di eksistensia fundadó i direktor Arthur Nivillac a mustra riba e situashon laboral na Kòrsou i tambe plannan di Optima. Esaki ta bira e último parti di un seri di artíkulo i kompaña ku nan video ku EXTRA a publiká.

Banko di krédito na Kòrsou i kombatimentu di pobresa

 

Den kuadro di situashon finansiero di trahadónan, Arthur Nivillac a bisa EXTRA ku nan meta for di aña pasa ta kombatimentu di pobresa. Optima tin un atenshon apart aki pa hendenan den problema finansiero, pasobra e ta e tòp number 1, siguí pa problema relashonal i na di tres lugá tin problemanan di adikshon.

Problema finansiero Optima a kaba di hasi un investigashon 3 luna pasa, basta grandi i ta bezig ta kompilando i interpretando e sifranan i pronto ta subi merkado ku e resultado. I den e kuadro aki mirando e situashon finansiero di trahadónan Nivillac a bisa ku Optima ta bai lanta un banko di krédito.

Nan ta bezig kaba i nan ke purba di hasié ku inisiativanan partikular, ya por dun’é e metodologia ku nan ke. “Pasobra bo no por solushoná problema finansiero na Kòrsou awor aki sin e banko. Pasobra tur banko a sera nan porta kasi pa problema finansiero i mi por komprondé. Nan ta pèrdiendo hopi sèn”. Nivillac a bisa ku nan ke yuda e trahadó pero nan di Optima no tin sèn den lachi. I p’esei mester yega na un banko, ku por aserka i hasi un bon análisis dikon e persona a yega den e problema finansiero, wak ku no ta un problema di kultura, wak ku no ta un adikshon, wak ku no ta algu sikológiko/sikiátriko. I na momentu ku tin e klaridat ei, e ora ei ta hasi inventarisashon di e debenan di e trahadó i ta pon’e bou di kuratela. Ta pone sikólogo pa guia e trahadó i e ora ei por ta sania e debenan.

Si e trahadó no ke firma pa bai den e trayekto menshoná, anto Optima lo no por yud’é via di e banko di krédito. “Duna sèn sin kambia un hende su patronchi di gasta plaka, su manera di dil ku sèn, bo no ta logra. Bo ta hink’é mas den problema i bo ta hasié mas dependiente di bo. Nos tin un training masha eksitoso ta duna ku nos a yama budget coaching. E ta wòrdu duná 5 pa 6 luna, dor di Optima i esei ta nifiká ku nos ta siña bu dil ku sèn. Nos ta siña bu spar, nos ta kambia bo mentalidat. Nos ta kambia bo karakter di dil ku sèn”. Asina lo wak e trahadó krese den spar sin tin mester di fia na banko.

 

Prostituí pa yega na sèn

 

Nivillac a bisa ku na Kòrsou tin un problema kultural grandi, un problema di midi, un problema di biba riba nos forsa, un problema di prioridat robes. “Tin un problema ku nos ta prostituí pa yega na sèn. E ta un porsentahe hopi haltu. Hopi hende ta prostituí aki nan pa yega na sèn. Hopi hende ta drumi ku otro pa yuda otro pa e sèn. I p’esei bo ta haña ku riba trabou tin hopi kolega ku relashon seksual ku otro, pasobra mi ke yuda bu pero mester tin algu bek”, Arthur Nivillac a enfatisá.

E problema finansiero ta pone bu pèrdè bo normal i balor i bo dignidat. E problema finansiero ta pone bu lastra te abou. El a mustra ku pa luna nan ta haña 12 pa 15 kaso króniko ku hende ta lastra, ku a bai den un shushedat. Ta un situashon fèrfelu i ora nan no wòrdu yudá, nan ta bin bati na porta di Optima. I ta tristu pa tende kiko e hendenan aki ta pasa aden pa nan wòrdu yudá pa 30 florin, 60 florin i hopi bia ku awa na wowo ta konta nan no kier a yega asina leu pero nan tin di kome. ‘Mi no tin ni 5 florin pa mi yega kas. Mi ta haña mi tin di drumi ku kolega òf drumi ku esun ku ta duna guia, ku mi direktor pa mi haña 10 florin. I e kosnan aki mi tin nan tur notá. Hopi bia nan ta kere ku ora bo ta papia bo ta papia pa papia pero ami tin nan notá. Un hende nos sa”, Nivillac a bisa ku basta preokupashon.

E realidat

 

Hopi bia e hendenan ta kai den e abismo finansiero pasobra ta stèns riba e hòmbernan ku tin. Ta esei ta e realidat i awor aki pió. Tin 2 aña ku porsentahe hopi haltu di pèrdè trabou, tin 2 aña ku un porsentahe ta pèrdè un parti di su salario, tin 2 aña ku un di e partidonan na kas ta pèrdè salario, tin 2 aña ku Incasso-nan ta pone beslag, pasobra pandemia a bin, tur dia por mira e sifranan pero no a bin ku maneho pa stòp e bürónan di inkaso. Stòp hendenan di saka hende for di kas pasobra nan a kai atras. Niun hende no a bin ku e maneho ei.

E pandemia aki ta eksihí otro maneho tambe. Ta nifiká ku abo a pèrdè bo trabou bo mester wòrdu protehá. Ku e paketenan di kuminda e hende no por paga su kas di hür, su hipotek, e no por paga telefòn, internèt, awa i lus.

“Ora mi papia e kosnan aki ta fèrfelu pero ta e kosnan aki mi ta haña tur dia. Mi tin voedsel paket aki traha, pa ora hende bin aki mi duna nan maske ta un, pa nan kome. No ta mi trabou, spesialista laboral mi ta, pero mi ta hasié pasobra tur dia tin hende ta bin pidi nos 5 florin òf nan ke laba outo pa 5 florin pasobra nan a pèrdè trabou. E situashon aki ta hopi hopi difísil”, Nivillac a splika

 

Trahadó mas sano i motivá ta oumento di produkshon

 

Arthur Nivillac a papia di Optima Arbodienst su plannan. Na promé lugá el a bisa ku e lei laboral tin di bini, esei sigur e ta bai bringa pe. Na di dos lugá e situashon finansiero, e banko di krédito tin di bini i outomátikamente nan ta birando grandi. E sistema ku Optima komo arbodienst ta funshonando ta ku nan ta unu, no tin mas. E sistema ku nan ta funshonando, e sistema ku nan ta bezig ta wak e trahadó den su boka di trabou, e sistema ku nan ta wak e dunadó di trabou pasobra nan ta bezig tur dia ta guia.

Awor aki dòkternan di kas a stòp di duna AO. A tuma e desishon ei sin informá e doño di trabou kosnan tin i dil ku e trahadónan. I p’esei nan di Optima a traha un guia ku ta duna paso a paso e reglanan i e derechinan di e kosnan ku nan tin di hasi i tene kuenta kuné. Esei Optima a manda pa su klientenan i tur ku a pidi nan.

I miéntras tantu Optima Arbodienst ta sigui krese. Nivillac a bisa ku e ta wak su mes den Karibe komo Occupational Health and Safety Optima.  E lo tin mayoria di empresa na Kòrsou serka dje i pa loke ta e personal esaki sigur lo a bira dos bia mas tantu ku awor. Ora e momentu ei yega e mes lo ta konsehero di Optima BV.

Nivillac ke logra ku tur partido ku ta mishi ku e sekshon laboral stòp di bringa otro Mester stòp di kompetí ku otro. Mester stòp di envidiá otro i ban traha huntu pasobra na momentu ku e boka di trabou  ta sano, na momentu ku e trahadónan ta sano, ora tin motivashon, produkshon lo krese i e ora ei apsentismo ta baha. Ora yega asina leu e lo bisa ku el a logra hasi pueblo mas konsiente di Arbo i el a logra su mishon!

 

LAGA UN KOMENTARIO

Please enter your comment!
Please enter your name here