QUITO, ECUADOR, AFP.- Ecuador a pèrdè por lo ménos 1.000 mion dòler kousa pa e protestanan di indigenanan resientemente, segun indikashon di e gerente di Banko Sentral, Guillermo Avellan, despues di 18 dia di manifestashon kontra gobièrnu ku a afektá diferente sektor inkluyendo di petroli.
“E montante a yega 1.000 mion dòler 775 mion dòler ta korespondé na sektor privá i 225 mion a korespondé na pèrdidanan den sektor estatal, spesífikamente di petroli”, segun indikashon di e funshonario na kanal Teleamazonas.
Konfederashon di Nashonalidatnan Indígena (Conaie), tabata na kabes di e protestanan. Conaie, a partisipá den protestanan ku a provoká kaida di tres presidente entre 1997 i 2005. E manifestantenan ta eksihí un disminushon di 21% di preisnan di kombustibel, suspenshon temporal di pagonan di krédito di kampesinonan na banko i suspenshon di aktividatnan di mina i petroli riba teritorionan nativo.
E manifestashonnan, ku a laga seis morto i mas ku 600 herido a baha despues ku gobièrnu a baha preis di kombustibel ku 8%. Despues di esaki preis a bira 1,75 dòler pa un galòn di diesel i 2,40 dòler pa un galòn di gasolin.
