DUBAI, EMIRATO ÁRABE UNI, AP.- E pueblo iraní a protesta djaluna despues ku e pais a atmití ku a kousa kaida di un avion di pasahero ukraniano i pa e gobièrnu su intento pa skonde e echo. Forsanan di seguridat a tira i a usa gas lakrimógeno pa disolvé e manifestantenan riba kaya.
E pueblo iraní, kual ta enfrentá sanshon fuerte imponé pa Merka a manifestá su asombro i protesta pa kaida di e avion ku a kobra bida di mayoria hóben. E pueblo a kondena e komunikadonan engañoso di funshonarionan haltu, kual a atmití e pais su responsabilidat despues di tres dia di preshon fuerte i na momentu ku Merka i Canada a indiká di tin prueba ku Iran a lansa un misil kual a kousa kaida di e avion.
E akontesimentunan a revelá un gobièrnu dispuesto na gaña su propio pueblo tokante e tragedia nashonal pa evitá bèrgwensa.
E protestanan a kuminsá djasabra anochi, algun dia despues ku Guardia Revolushonario a atmití ku e kaida di e avion tabata un eror. Un akto di solidaridat pa esnan ku a pèrdè nan bida na bordo di e avion a kombertí den un protesta kontra gobièrnu. E manifestantenan a kongregá riba Plaza Azazi di Tehran.
E hefe di polis di Tehran, general Hossein Rahimi, a ninga ku su agentenan a tira kontra e manifestantenan.
Vários a akusá Guardia Revolushonario den pasado, dor ku nan a tira vários manifestante mata, na momentu ku esakinan a protesta kontra oumento di preis di gasolin dekretá pa e gobièrnu den luna di novèmber. Mas o ménos 300 persona a muri den e konfrontashonnan aki.
