Sostenedónan dje grupo nashonalista “Antigua Orden Dominicana” durante di un marcha di protesta kontra di migrashon ilegal di haitianonan den e pais.
SANTO DOMINGO (AFP).- Un total di 32 persona a keda detené djadumingu na Rep. Dominicana despues di un manifestashon kontra di migrashon ilegal for di Haiti, ku a terminá den enfrentamentu ku outoridatnan.
E protesta a keda konvoká pa e grupo nashonalista “Antigua Orden Domincana” den e komunidat haitiano di Friusa, Bávaro.
Na final di e protesta, un grupo “encapuchá” a purba drenta un bario residensial kustodiá pa outoridatnan “generando un insidente”, segun polis a duna di konosé.
“Nos tin 32 persona detené”, segun e direktor di Policia Nacional, Ramón Guzman Peralta, kende a bisa ku tambe a konfiská un arma di kandela. No a reportá herido.
Rep. Dominicana i Haiti ta kompartí e isla La Española i tin un historia di konflikto.
Segun datonan ofisial, na Rep. Domiincana ta biba den kareda di 500.000 haitiano.
Gruponan nashonalista ta bisa ku e sifra di inmigrantenan a oumentá den último añanan debí na e krísis ekonómiko i violensia kresiente di gènnan ku ta kontrolá gran parti di Haiti.
E gruponan akí ta demandá di gobièrnu dominikano medidanan mas fuerte pa frena e inmigrashon haitiano, apesar ku e polítika migratorio a bira mas severo for di despues ku e presidente Luis Abinader a yega na poder.
Abinader (57) a reforsá e presensia di forsa armá na frontera, a konstruí muraya entre e dos paisnan i a start un akshon pa deportá 10.000 haitiano pa siman.
Den 2024 so ya nan a ekspulsá 276.000 migrante, segun sifranan ofisial.
