Protesta kontra presensia Delcy Rodriguez na Nashonnan Uní

Demostrashon na Caracas kontra e echo ku presidente interino venezolano Delcy Rodriguez lo atendé e di 81 Asamblea General di Nashonnan Uní.

CARACAS, Venezuela (AFP).- “E no ta representá nos!”, tabata gritu di un grupo di komo 50 venezolano kendenan ayera a manifestá na Caracas kontra e partisipashon di presidente interino Delcy Rodriguez den Asamblea General di Nashonnan Uní. Rodriguez a asumí poder den luna di yanüari despues di kaptura dje presidente dje tempu ei, Nicolas Maduro, den un operashon di Merka. E ta goberná bou di preshon di Washington i a bin ta restablesé relashonnan ku gobièrnunan, empresanan i organisashonnan internashonal despues di añanan di aislamentu.
Komo 50 opositor dje gobièrnu chavista a konsentrá dilanti dje sede di Programa di Nashonnan Uní pa Desaroyo (PNUD). Nan ta akusá Nashonnan Uni di ta “legitimá” Rodriguez i ta rechasá e “kontrol” di Merka konsiderando ku esaki a pone un banda e promesa di transishon demokrátiko.
Esnan ku a protestá, a karga bòrchinan di rechaso kontr’e Rodriguez i Washington ku mensahenan manera “Delcy na rudia dilanti di imperio” i “Venezuela tin bos i esei no ta esun di Delcy”. Segun un dje manifestantenan “nos ta rabiá pa e situashon deplorabel di nos pais i asina mes nan a rekonosé un persona ku tambe ta responsabel di tur e miseria ku nos ta bibando”.
Despues di su yegada na New York djaluna, Rodriguez a reuní ku direktiva di Fondo Monetario Internashonal i otro organisashonnan importante. Despues el a keda risibí pa e sekretario general di Nashonnan Uní, Antonio Guterres, pa un saludo protokolar.
Rodriguez ayera nochi lo a reuní ku Donald Trump, miéntras ku awe lo e hiba palabra den Asamblea General di Nashonnan Uní. “Su agènda ta un bòftá den kara dje pueblo venezolano, ya ku e siudadano aki nunka a keda eligí, nunka a vota p’e”, segun e aktivista polítiko José Gregorio Ochoa.