LAWTON, OKLAHOMA, MERKA, AP.- Manifestantenan a denunsiá e plan di presidente Donald Trump pa pone muchanan migrante den un base militar na Oklahoma.
Ofisina Traslado pa e Refugiado a anunsiá resientemente ku e tin plan di warda te ku 1.400 mucha ménos di edat den e base, kual ta serka di Lawton. E base Fort Sill a refugiá muchanan migrante na aña 2014 tambe, durante e gobièrnu di eks presidente Barack Obama.
Promé ku e protesta, diferente persona a reuní na e base pa un konferensia di prensa. Un hòmber ku un unifòrm militar a pidi e grupo pa bandoná e sitio pero e grupo a keda i terminá e konferensia promé ku nan a dirigí rumbo pa e parke kaminda e protesta a sosodé.
E muchanan migrante sin kompaño a yega na frontera sùit di Merka, spesialmente for di Guatemala, Honduras i El Salvador. Den mei, agentenan na frontera a detené 11.507 menor ku tabata biahando sin un mayor.
