Manifestashon grandi den Strasbourg, den ost di Fransia, durante di un dia di wèlga general den e pais kuestionando e presupuesto nashonal di gobièrnu.
PARIS, Fransia (AFP).- Algun shen mil persona a manifestá na Fransia pa eksigí pa e promé minister nobo, Sebastien Lecornu, bandoná e polítika di “ousteridat” den presupuesto pa 2026 i oumentá impuesto riba esnan riku. E mobilisashon, konvoká pa sindikatonan, tambe a sirbi pa ekspresá nan “malkontentu ku e presidente franses Emmanual Macron, kende su polítika fiskal i sosial a generá hopi protesta for di momento ku el a yega na poder den 2017.
“Ora bo mira ku esnan mas riku ta yena nan sakunan a kosto di nos i ta pidi pa e klasenan popular hala faha mara, ta yega un momento den kua bo ta bisa di no por mas”, segun un dje manifestantenan.
E promé minister franses, Francois Bayrou a lòs e protestanan ku su plan presupuestario pa 2026, ku ta mustra rèkertnan na rason di 44.000 mion euro i e anulashon di dos dia di fiesta.
E parlamento a tumba su gobièrnu siman pasá. Su susesor, Sebastien Lecornu, a anunsiá elaborashon di un programa nobo ku o ta inkluí eliminashon di dianan liber, pero e sindikatonan a mantené e manifestashon pa eksigí ku e gobièrnu ta bandoná asina yamá “e museo di horornan” di Bayrou.
Ounke e marchanan a desaroyá den su gran mayoria di forma pasífiko, e forsanan di seguridat a hasi uso di gasnan lakrimógeno kontra manifestantenan den e siudatnan Paris, Nantes i Rennes. Den kareda di 300 persona a keda detené.
