BRUSELAS, AP.- Gran Bretaña i Union Europeo mester di “hopi tempu mas” pa negoshá un akuerdo di separashon. Asina e representante prinsipal di UE den e proseso a indiká.
Despues di yega Bruselas pa un kumbre di UE riba e tema, Michael Barnier a bisa ku ámbos parti a traha duru riba e tema pero “ainda nos no a logra e meta”.
Reunionnan di siman pasá pa haña un akuerdo a frakasá debí na e tema di frontera entre Irlanda i Irlanda Nort. Ambos parti mester haña un solushon kon pa para tráfiko liber di produkto i personanan via e frontera entre Irlanda i Irlanda Nort na momentu ku Gran Bretaña sali di UE.
Esaki a kibra tur speransa ku lo logra un akuerdo pa djárason.
Barnier a bisa: “Nos mester di hopi tempu mas i nos lo sigui traha riba esaki den e simannan benidero, ku pasenshi”.
Promé minister britániko Theresa May a yega e kumbre djárason, kaminda el a purba konvensé e otro lidernan di Union Europeo ku su plannan pa e separashon no a frakasá, apesar di vários pedido di e bloke pa e presentá un enfoke nobo.