Riba e potrèt lider opositor Ozgur Ozel ta dirigí su mes na e multitut na Ankara
TURKIA, AFP.- Por lo ménos 50 mil persona a partisipá ayera na Ankara den un protesta di e partido opositor prinsipal di presidente turko Recep Tayyip Erdogan, CHP promé ku e oudiensia hudisial ku por destruí e direkshon di e formashon ei.
Koresponsal di AFP a opservá kon e manifestantenan tabata yena e plasa Tandogan di e kapital turko, ku banderanan turko i hopi di nan ku kamisanan ku imágen di e tata fundadó di e repúblika turko Mustafa Kemal Ataturk.
Segun vise presidente di e Partido Republikano del Pueblo CHP sosial demókrata, Murat Bakan, na e akto aki a asistí mas òf ménos 50 mil persona. Den un diskurso for di e podio e lider di CHP Ozgur Ozel a bisa na e multitut ku nan a reuní pa oponé e gòlpi hudisial ku ta tumando lugá kontra di e partido, refiriendo na e oudiensia den tribunal di awe, ku por desemboká den su terminashon.
“E gobièrnu aki no ke demokrasia. Nan sa ku nan no por gana elekshon si tin demokrasia. Nan no ke hustisia; nan sa si tin hustisia nan no por tapa nan krímennan”, asina el a bisa
