WILLEMSTAD.- Den 2027 Ministerio di Desaroyo Ekonómiko lo sigui traha riba realisashon di alternativanan duradero pa konekshon entre Kòrsou i Aruba. Tambe lo traha riba desaroyo mas aleu i implementashon di kondishonnan i kuadronan pa asina por realisá e proyekto aki di forma responsabel den futuro.
Ta for di 2025 Minister di Desaroyo Ekonómiko di Kòrsou, Roderick Middelhof i Minister di Finansa, Asuntu Ekonómiko i Sektor Primario di Aruba, a duna formalmente e inisio pa e desaroyo di un konekshon di fèri entre e dos islanan. E inisiativa akí ta representá un paso esensial pa integrashon regional, mobilidat i un kooperashon marítimo mas amplio.
E Konseho di Minister di e dos paisnan a aprobá e plan di akshon pa realisá e konekshon di fèri. Ku esaki, Hulanda tambe a aprobá e petishon pa finansiamentu via e paketenan di pais, loke ta pone un suma di supsidio disponibel pa e promé fase di e trayekto. E proyekto ta inkluí un estudio di faktibilidat konhunto, ku tin den su alkanse preparashon i ehekushon di un destaho públiko.
Meta final ta pa atraé un operador di fèri kompetente ku por ofresé un konekshon konfiabel i futuro resistente entre Aruba i Kòrsou. For di 2025 mester a tuma lugá un kantidat di análisis tékniko, ekonómiko i ekológiko, i tambe un diálogo struktural ku gruponan di interes (“stakeholders”). Si e resultado ta positivo, mester a sigui ku e proseso di destaho públiko, ku meta final pa otorgashon na un operador den 2026. Pero mester por tuma nota pues den e konsepto di presupuesto 2027 te ainda no a yega asina leu ku e proyekto, i ku ta kanando atras riba e skema di planifikashon.
“E proyekto akí ta reflehá nos ambishon pa fortales’é i amplia nos kooperashon ekonómiko i turístiko den region. Un konekshon ku fèri entre nos islanan no ta solamente un medio di transporte, pero un brùg pa kresementu duradero i un laso regional mas fuerte,” Middelhof a duna di konosé na 2025. Minister Geoffrey Wever di Aruba a ekspresá: “Mi ta partikularmente satisfecho ku e proyekto akí ku nos ta desaroyá huntu ku Kòrsou i Hulanda. Un bon konekshon entre Aruba i Kòrsou, pa persona i pa karga, lo trese benefisio direkto pa nos ekonomia i pa nos siudadano. Kooperashon regional ta birando mas i mas importante, spesialmente mirando e desaroyonan geopolítiko den nos region.”
Den e presupuesto 2027 ta indiká ku e konekshon di fèri ta un oportunidat úniko tambe pa diversifiká e produkto turístiko di Kòrsou i Aruba miéntras ku e ta kontribuí na un mihó koperashon entre siudadanonan di ámbos isla. Segun e presupuesto ainda ta hasiendo investigashon riba viabilidat di un servisio di fèri regular entre Kòrsou i Aruba i kiko tur e kondishonnan nesesario ta enserá.
