WILLEMSTAD.- Ayera gobièrnu a start ku e proyekto piloto di vakuna den bario. E promé bario ku a start kuné tesun di Steenrijk. Despues ku e personanan kaba di vakuna, nan ta sinta e 15 minüt pa opservashon den misa di Steenrijk.
Tim di Vakunashon ta drenta barionan di Kòrsou ku e proyekto piloto: “Vakuna Den Bario”. Entrante djadumingu awor 2 di mei, e Tim di Vakunashon ta drenta algun bario riba dianan spesífiko pa asina fasilitá abitantenan e posibilidat pa hasi pregunta i tambe bakuná den nan mes bario na e sentro mobil den bario. Esaki ta posibel entre 9’or di mainta nòn stòp te ku 4’or di atardi.
Tim di Vakunashon, enkabesá pa Epidemiólogo Irálice Jansen, ta trahando inkansabel último simannan riba e trayekto di Vakunashon di komunidat di Kòrsou. A kuminsá e trayekto ku hendenan di 60+ i gruponan di riesgo, pa despues amplia e kapasidat pa komunidat kompleto vakuna. Den e trayekto anterior a eskalá sentronan di vakunashon pa asina por akapará tur ku kier òf por a bai bakuná. Mirando ku tin un grupo grandi di nos komunidat ku no tin e medionan pa yega na un di e sentronan di vakunashon, awor a krea e posibilidat pa bai den barionan di Kòrsou.
Bibando Den Bario ta hiba kombersashon ku miembronan di komunidat ku no ta asina konektá ku medionan digital, ku e grupo ku kisas ainda tin pregunta òf duda i alabes pa fasilitá e gruponan den nos komunidat ku no por yega e sentronan di vakunashon mas grandi. E trayekto di vakunashon den bario ta den kolaborashon ku representante i lidernan di bario, pa por yega mas serka di e abitantenan ku kisas ainda no tin e informashon òf medio pa yega na informashon nesesario.
Den kolaborashon ku LABdeMED i ADC ta bai ku algun unidat mobil den e barionan. E unidatnan mobil ta ekipá ku tur rekesito i seguridat di un Sentro di Vakunashon i tambe tin asistensia médiko i di opservashon. Adishonalmente ta bai ofresé transporte grátis den bario, den koperashon ku ABC Busbedrijf. Den kada bario ku bishitá, ta bai tin bùsnan ta kore den e barionan i besindario pa buska i hiba abitantenan ku ke bishitá e sentro mobil di bakunashon.
Orario di bakunashon den bario ta di 9’or di mainta pa 4’or di atardi, pa tur habitante i tambe personanan indokumentá. E barionan ku lo bishitá den e promé ronda di Bibando Den Bario ta:
Djadumingu, 2 di mei: Misa di Steenrijk; Djaluna, 3 di mei: Misa di Steenrijk i Misa di Soto; Djamars, 4 di mei: Sentro di Bario Bonam i Misa di Tera Kora; Djárason, 5 di mei: Sentro di Bario Bonam i Misa di Tera Kora.
Tim di Vakunashon ta invitá abitantenan di Steenrijk, Soto/Sta. Martha, Bonam, Tera Kora i tur bario den besindario pa pasa libramente. Sea na pia, ku outo òf ku e transporte grátis, pa asina hasi tur pregunta tokante bakuna i bakuná si esaki ta bo deseo.
Tur e rutanan di transporte grátis di kada bario, ta optenibel tambe riba kanalnan ofisial di Gobièrnu di Kòrsou.

LAGA UN KOMENTARIO

Please enter your comment!
Please enter your name here