Aresto gobernador no a kambia e asuntu
WILLEMSTAD.- Kòrsou a hañ’é den e nesesidat di buska alternativa despues ku Venezuela a sera frontera pa nos. Un di e alternativanan a resultá La Guajira Colombia, for di unda a logra sera akuerdonan pa abastesé Kòrsou ku fruta i berdura di bon kalidat. Sinembargo último dianan a parse manera ku no tin barku mas ku fruta i berdura for di La Guajira. Ta bini aserka ku tabatin kambio di gobernador di La Guajira despues ku esun anterior a haña problema ku hustisia i asta mester sinta un kastigu pa kaso di korupshon. Esakinan a pone ku EXTRA a bai investigá.
Ta resultá ku di parti di La Guajira, nan a kue e oportunidat pa abastesé Kòrsou ku su produktonan tene duru. E komunidat di La Guajira a mira e oportunidat aki pa nan tambe konosé mas desaroyo i logra mas adelanto kaminda nan produktornan ta haña un merkado unda nan por distribuí nan produktonan sin problema. Informashon ku EXTRA ta disponé di dje ta indiká ku na Colombia a surgi sierto situashon ku mester a haña atenshon speshal. Esei mes a pone ku barkunan ku fruta i berdura a wanta un ratu miéntras ta kaba di atendé e detayenan.
Den kombersashon ku Wilbert Geertuida presidente di Adeck e tabata sumamente entusiasmá pa e rumbo positivo ku e proyekto a kue. E dirigente a splika EXTRA ku na e momentunan aki nan ta hasiendo trámitenan pa garantisá kontinuashon i esei ta logrando perfektamente ya ku outoridatnan di La Guajira tambe ta mira e benefisio pa e estado. No ta un barku so, esun ku a yega Kòrsou inisialmente pero tin mas boto ku ta na disposishon di Kòrsou pa trese kargamentu di fruta i berdura for di La Guajira.
Geertruida a duna di konosé ku bèrdat a surgi un situashon di konfushon serka algun outoridat na La Guajira, loke a pone ku e Plataforma Gran Karibe na kua Geertruida/Adeck tambe ta partisipá, a bai reuní ku e gobernador nobo i tur e sektornan konserní. A bai asina leu ku a logra akuerdonan konkreto ku instansianan manera polis, duana i otro outoridatnan. E gobernador nobo na su turno a bai Bogota pa einan presentá i splika e benefisionan di e proyekto aki pa La Guajira i Kòrsou. Por spera ku pronto e barkunan lo kuminsá yega Kòrsou i hinter komunidat lo ripara ku ta trata di un proyekto duradero. Mas detaye den edishon di EXTRA.
