RIO DE JANEIRO, BRASIL (AFP).- Polis brasilero a rekomendá pa kulpa e eks-presidente di ekstrema derecha Jair Bolsonaro pa ker a realisá un gòlpi di estado pa stroba e toma di poder dje iskierdista Luiz Inacio Lula da Silva despues di esaki su viktoria den elekshonnan di 2022.
Bolsonaro, di 69 aña, ta figurá riba un lista di 37 persona ku segun polis federal mester keda prosesá pa “krímennan di violá leinan di estado demokrátiko, intenshon di gòlpi di estado i organisashon kriminal”, segun un komunikado.
Polis a konkluí un investigashon ku durante di kasi dos aña a akumulá pruebanan riba eksistensia di un “organisashon kriminal ku a aktua di forma koordiná den 2022 ku e intenshon pa mantené presidente dje repúblika na poder”.
Ademas dje eks-mandatario (2019-2022), polis ta rekomendá pa prosesá su eks-minister di defensa, e general Walter Braga Netto, kende tabata su fórmula komo vise presidente den e elekshonnan ku el a pèrdè kontra dje aktual hefe di estado.
Tambe a rekomendá e mesun kos kontra di otro funshonarionan durante presidensia di Bolsonaro, entre kua e minister di hustisia Anderson Torres.
Bolsonaro ta pretendé di ta kandidato pa presidente den elekshon di 2026, pero e ta inhabilitá te ku 2030 pa motibu di a suministrá informashon robes riba e sistema brasilero di voto elektróniko.
