CARACAS.- No ta falta muchu ora mas pa urnanan na Venezuela sera awe djadumingu 20 di mei, dia di elekshon presidensial den e pais latinoamerikano. Konseho elektoral Nashonal CNE ta kordinando e elekshon i e presidente a dirigí su mes na e nashon via di radio i televishon.
Ta parse ku no tin muchu ánimo pa vota riba e dia aki. Prinsipalmente den sentro di siudat ta parse ku masha tiki ta e votadónan ku a bai ehersé nan derecho di voto. Miéntras ku e gobièrnu ta bisa ku tin hopi hende ku a vota den oranan di mainta, partidonan di oposishon si ta insistí ku esei ta un mentira pasobra no tin muchu ánimo pa vota den elekshon aki.
Tur kos ta indiká ku presidente lo keda na poder apesar di e situashon pésimo ku e pais ta pasando aden pa último añanan. Esei ta nifiká ku pueblo venezolano lo tin Nicolaas Maduro pa seis aña mas komo nan presidente. Manera indiká anteriormente, Maduro a bai depositá su voto 6’or di mainta i na e okashon ei el a akusá otro paisnan di e situashon malu den su pais. Maduro a pidi mundu kompletu pa stòp ku kampañanan ku ta hasi daño na Venezuela i su pueblo.
E otro kandidato den e elekshon ta Henri Falcon. Falcon tin bon chèns kontra Maduro, pero analistanan ta kere ku e pobernan lo no kore e riesgo di keda sin vota pa Maduro ya ku e aktual presidente ta kontrolá ken ta haña pakete di kuminda. E venezolanonan no por tuma e luho di pèrdè e pakete di kuminda den e situashon ku e pais ta na e momentunan aki.
Mas ku mitar di e poblashon di e pais (17 mion) tin un karchi ku nan por usa pa haña e pakete di kuminda. Ademas Maduro a primintí ku e ta rifa un premio entre tur esnan ku hasi uso di nan tarheta di kuminda pa vota.
Tin un pastor evangelio ku tambe a pone su mes eligibel. E pastor aki ta parti kuminda pa hende pober. Venezolanonan na tur parti di mundu a lansa nan bos di protesta.
Aki ratu 6’or urnanan ta sera.
