CARACAS.- Awe 20 di mei pueblo venezolano ta bai urna pa eligí un presidente nobo pa e pais suramerikano. Awe mainta tempran pa mas o ménos 6’or presidente Nicolas Maduro a depositá su voto. Tur kos ta indiká ku Maduro lo keda na poder despues di e elekshon di awe, loke ta nifiká ku e lo tei pa un término di 6 aña mas na kabes di e pais. Analistanan polítiko internashonal ta premirá ku si Maduro gana esei lo por okashoná mas problema pa Venezuela ya komo ku komunidat internashonal posiblemente lo imponé mas sanshon riba e pais. Ta premirá ku Merka sigur lo imponé sanshonnan kontra e gobièrnu di Maduro.
Ya kaba a bira konosí ku partidonan di oposishon ta bòikòt e elekshon. Oposishon no a inskribí ningun kandidato pa partisipá na e elekshon aki i ta pidi pueblo venezolano pa apstené di vota. Segun sifranan ofisial mas di 20 mion venezolano por depositá nan voto den e elekshon aki. Mas ku 1.7 mion venezolano a hui for di e pais kaba debí na e situashon sosio ekonómiko i sosial pésimo den e pais. Islanan Kòrsou, Boneiru i Aruba tambe a sinti esaki i mester a aktua pa evitá situashonnan ku ta hinka e paisnan aki i nan ekonomia den mas problema.
Inflashon a surpasá 14.000% na Venezuela loke ta algu nunka bisto.
Voice of America den un informe ta indiká ku e reakshon di votadónan ta hopi ketu den oranan di mainta na Caracas. Por lo ménos 40 pais rònt mundu inkluyendo Union Oropeo, Merka i paisnan den e grupo di Lima a rechasá e elekshon bisando ku no tin sufisiente garantia ku e pueblo venezolano lo por ehersé su derecho kompletamente liber. Iglesia katóliko tambe, huntu ku vários otro pais i institutonan di renombre internashonal a konsehá pa posponé e elekshon te último kuartal di e aña aki. Sinembargo no a duna oido na niun di esakinan.
