WILLEMSTAD.- Djaluna dia 6 di aprel 2026 i djadumingu 12 di aprel 2026 lo tuma lugá e respektivo marchanan di seú di Banda Riba i Banda Bou.
Pa por garantisá ku e fiestanan aki ta keda bèrdaderamente un ambiente festivo, ta urgi tur doñonan di establesimentu i portadónan di un pèrmit ku ta bende konsumo, pa no bende ningun tipo di bebida den bòter of na bleki.
E ophetonan aki por keda fásilmente usá komo arma na momentu ku surgi un pleitu of bringamentu.
Konsekuentemente esaki ta trese peliger pa òrdu públiko i seguridat di tantu partisipantenan komo e públiko.
P’esei e yamada na establesimentunan di Horeca, pa no laga bòter i bleki di ningun forma, tampoko komo produkto destiná pa benta afó, resultá riba kaya ku tur e konsekuensia ku esakinan por tin.
Ademas e petishon na propietarionan di establesimentunan di pèrmit, pa tene nan mes estriktamente na e orario ku nan mester sera, konforme di nan pèrmit.
Tantu MEO komo Polis lo sa di tene debidamente kontròl riba e puntonan aki riba menshoná i lo aktua kaminda esaki ta nesesario.
Tur eventual gastu ku e kontròl i posibel medidanan lo trese kuné, lo bai pa kuenta di e portadó di e pèrmit.
