MOSCOW, RUSIA, AFP.- Presidente di Rusia, Vladimir Putin a defendé e invashon den Ukrania i a kritiká Kiev i paisnan oksidental, purbando di alimentá patriotismo di e pueblo i su sosten na e kampaña riba Dia di Viktoria.
Den un diskurso na komienso di e gran desfile militar anual riba Plaza Kora di Moscow, kual ta konmemorá e viktoria soviétiko kontra nazi di Alemania na 1945, Putin a sigurá ku su ehérsito ta kombatiendo den Ukrania pa defendé e patria kontra “menasanan inaseptabel” ku e pais ta representá.
Dos luna i mei despues di a invadí Ukrania, e kombatenan ta konsentrá na ost di e pais. Rusia mester a baha su ambishonnan pa motibu di e resistensia feros di trupanan ukraniano, armá pa paisnan oksidental.
Putin a bolbe hustifiká su desishon pa lansa e atake kontra Ukrania riba 24 di febrüari, indikando ku Kiev ta preparando un atake kontra separatistanan pro ruso na ost di e pais, nan ke konstruí un bòm atómiko i a haña sosten di NATO.
