BEIJIN, CHINA (AFP).- E presidente ruso, Vladimir Putin, a yega China pa un bishita di dos dia durante kua lo e reuní ku su kolega, Xi Jinping, i trata di haña mas apoyo di un aliado klave den pleno guera kontra di Ukrania.
Imágennan difundí pa televishon ruso, ta mustra e hefe di Kremlin na momento di a keda risibí pa funshonarionan chines i un guardia di honor ora ku el a baha for di avion na Beijing.
Ta e promé biahe pa estranhero di Putin for di despues di su reelekshon den mart último i su di dos den ménos ku mitar aña pa China, un sosten ekonómiko importante pa Rusia despues di e sanshonnan imponé pa paisnan oksidental pa motibu di su ofensiva den Ukrania.
Algun dia promé ku lansamentu dje invashon, Rusia i China a afirmá nan amistat “sin límite” i for di despues di esei e relashon diplomátiko i i komersial entre e dos paisnan a bira mas fuerte. Inkluso Xi a ignorá krítikanan di oksidente pa e relashon, ku ta permití China importá energia barata di Rusia i por yega na rekursonan natural dje pais aki, por ehèmpel via dje sistema di gas di Siberia.
E dos lidernan a topa otro kara kara ya na kuater okashon for di despues di e invashon di Ukrania, den febrüari di 2022.
E aliansa ekonómiko aki tin Merka rabiá, ku a menasá ku sanshon i pa saka bankonan chines konektá ku e makinaria di guera ruso for di e sistema finansiero internashonal.
Ta e intenshon pa e dos lidernan firma un deklarashon konhunto i asistí na un seremonia pa konmemorá e 75 aniversario di relashonnan diplomátiko bilateral.
E sekretario di estado norteamerikano, Antony Blinken, kende a reuní ku Xi luna pasá na Beijing, a atvertí ku e respaldo di China na e “guera brutal di agreshon” di Rusia a yuda e pais aki pa oumentá su produkshon di ekiponan di guera.
Despues dje invashon di Ukrania, e komersio entre China i Rusia a subi te na nivel rekort di 240.000 mion dollar den 2023, segun datonan di servisionan di duana di Beijing.
Pero, despues dje menasa merikano na institushonnan finansiero chines, e eksportashonnan di China pa Rusia a kai den lunanan di mart i aprel kompará ku aña pasá.
