...Presidentenan Maduro i Putin próksimamente lo bolbe topa otro. Miéntras ku Trump ta estrechá amistat ku Putin i ta tuma medida kontra di Venezuela, e presidente ruso i esun venezolano ta anunsiá futuro kolaborashon ku otro…
CARACAS (AFP).- E presidente ruso, Vladimir Putin, i su kolega di Venezuela, Nicolas Maduro, a anunsiá ayera den un ‘video conference’ un akuerdo pa “amplia” e relashon bilateral riba diferente tereno, inkluso e sektor energétiko, ounke sin duda detayenan dje konvenio.
Dianan despues ku Merka a revoká e lisensia ku ta permití e gigante petrolero norteamerikano Chevron, pa operá den Venezuela apesar dje sanshonnan finansiero ku Washington i imponé riba e pais karibense, Putin a invitá Maduro pa bishitá Mosku pa firma e akuerdo dia 9 di mei próksimo, komo parti di selebrashon di Dia di Viktoria den di Dos Guera Mundial.
“Nos a yega na nivel di relashonnan stratégiko”, segun e gobernante ruso. “Tin akuerdo total pa loke ta trata e konvenio di asosiashon stratégiko i koperashon ku lo forma un base sólido pa amplia e relashonnan bilateral aun mas tantu”, Putin a sigui bisa. “Lo mi ta kontentu di mir’e na Rusia den e selebrashonnan dia 9 di mei”, el a remarká dirigiendo su mes na Maduro.
Despues di a revoká e lisensia di Chevron, e atministrashon di Donald Trump a atvertí ku lo e revisá e pèrmit duná na otro kompanianan energétiko manera esun franses Maurel & Prom i e spañó Repsol.
