Huma ta sali for di un edifisio bombardiá pa Rusia den e kapital Kiev na Ukraina. Rusia a reanudá su atakenan riba Ukrania despues di tres dia ku nan no a hasi esei.
MOSKU, Rusia (AFP).- E presidente ruso, Vladimir Putin, i esun norteamerikano, Donald Trump, a mantené un kòmbersashon “ekstremadamente franko” relashoná ku e guera den Ukrania, segun Kremlin a informá. Miéntras tantu, Mòsku a reanudá su bombardeo masivo kontra teritorio ukraniano despues di un ‘break’ di tres dia.
E mesun dia, e mandatario ukraniano, Volodimir Zelenski, a duna di konosé ku negoshadónan di Ukrania, Rusia i Merka lo por reuní e luna’ki pa purba na haña un salida diplomátiko dje konflikto. Di su parti Mòsku tabata mas prudente. Segun Kremlin ku ainda ta “muchu trempan” pa papia di términonan konkreto di un enkuentro asina.
E kòmbersashon entre e presidentenan di Merka i Rusia a tuma lugá despues ku e e representantenan di Washington, Steve Witkoff i Jared Kushner, a biaha durante di wikènt último pa Mòsku i Kiev. E meta tabata pa reaktivá e esfuersonan norteamerikano, stanká pa un tempu kaba, pa pone fin na e kombatenan mediante negosiashonnan nobo di forma dirèkt entre e dos partinan den e konflikto.
Den e kòmbersashon telefóniko, Trump a boga pa un fin hopi lihé dje operashonnan militar, miéntras ku Putin a presentá un “análisis ophetivo detayá” di e situashon, esaki segun Yuri Ushakov, asesor diplomátiko di Kremlin.
E kòmbersashon “a dura un ora presis, tabata konstruktivo i ekstremadamente franko”, segun Ushakov, kende a agregá ku Putin durante dje kòmbersashon a bisa di no tin “ningun plan agresivo” kontra di Europa.
Te ku ayera tardi, ni Donald Trump ni White House a divulgá un vershon ofisial dje yamada.
