MOSKU, Rusia (AFP).- E presidente ruso, Vladimir Putin, a bisa ayera ku su pais ta dispuesto pa negoshá pa pone fin na e konflikto den Ukrania, pero a rechasá e posibilidat pa hiba kòmbersashon dirèkt ku Volodimir Zelenski, kende e ta konsiderá komo “ilegal”.

E presidente norteamerikano, Donald Trump, a preshoná na ámbos banda pa pone fin na e konflikto ku ya ta alargando pa kasi tres aña, i siman pasá el a afirmá ku Zelenski ke negoshá un “akuerdo” pa para e peleanan.

“Si e (Zelenski) ke partisipá den e negosiashonnan, ami lo eligí e personanan pa tuma parti den esakinan”, segun Putin a bisa, kalifikando e presidente ukraniano di ta “ilegal”  pa motibu ku su mandato a ekspirá durante e lei marsial.

E mandato di Zelenski a ekspirá, pero lei ukraniano ta prohibí pa tene elekshon miéntras ku lei marsial ta na vigor, Esaki a keda dekretá for di inisio dje ofensiva ruso, den febrüari di 2022.

E presidente ruso a agregá ku kualke negoshashon lo ta “ilegal” si e tuma lugá aktualmente, sitando un dekreto di Zelenski, ku den òktober di 2022 a deskartá kualke negoshashon miéntras ku Putin ta na poder.

Putin mas aleu a bisa ku e guera por kaba den dos luna mas o ménos si e paisnan di oksidental retirá nan apoyo na Ukrania.

“Nan lo no wanta ni un luna mas si plaka kaba, i den un sentido mas amplio, e munishonnan. “Tur kos lo kaba den un luna i mei’, segun e presidente ruso.

E konflikto no a baha na intensidat, apesar ku Trump a primintí ku lo e logra hopi like pa para e guera una bes ku e drenta White House.

Outoridatnan ruso a bisa djaluna ku ningun hende dje ekipo di Trump a drenta den kontakto ku Mòsku pa regla un enkuentro ku Putin, pero tur dos parti ta parse di ta dispuesto na reuní.

Kiev a señalá di no ta di akuerdo pa keda na un banda durante eventual kombershonnan di pas, i a akusá Putin di ta buska pa “manipulá Trump.

LAGA UN KOMENTARIO

Please enter your comment!
Please enter your name here