Partisipantenan na St. Petersburgh, Rusia, ku potrèt di nan respektivo famia (sòldánan di 2da Guera Mundial) ta tuma parti na un marcha pa konmemorá 80 aniversario di viktoria di Union Soviétiko riba Alemania nazi.
MOSKU, Rusia (AFP).- Vladimir Putin a rindi homenahe na sòldánan aktivo den Ukrania. A hasi esaki den un desfile relashoná ku aniversario di viktoria riba Alemania nazi. E aktividat a tuma lugá kontando ku presensia di dirigentenan estranhero, inkluso presidente di China i di Brasil.
Koinsidiendo ku e konmemorashon, e presidente ruso a deklará di forma unilateral tres dia sin atake riba Ukrania, loke a drenta na vigor djaweps mei anochi.
Ukrania, sinembargo, a kalifiká esaki un “farsa” i a bisa di a registrá atakenan ruso riba henter liña dje guera i ku algun shen violashon di lokual Putin a bisa.
Kremlin a probechá dje konmemorashon di 80 aña di fin di 2da Guera Mundial pa duna bida na e patriotismo den Rusia i proyektá influensia diplomátiko den estranhero, ku presensia di entre otro e presidente chines Xi Jinping i e brasilero Luiz Inácio Lula da Silva.
“Henter e pais, e sosiedat i e pueblo ta apoyá e partisipantenan den e operashon militar spesial” den Ukrania, segun Putin a deklará den un diskurso for di tribuna, kaminda el a demostrá su amistat ku Xi.
Alrededor di 1.500 sòldá ku a lucha den e ofensiva den Ukrania a tuma parti na e desfile militar riba Plasa Korá di Mosku, kontando ku un total di 11.000 persona.
Nos ta orguyoso di bosnan balentia i determinashon, di bosnan fortalesa di espíritu, ku semper ta hiba nos na viktoria”, segun Putin a agregá.
Kontra di su ofensiva diplomátiko, vários minister di eksterior di Union Europeo a biaha pa e siudat di Leopolis, den wèst di Ukrania, kaminda nan a aprobá e kreashon di un tribunal spesial pa husga dirigentenan ruso pa e agreshon kontra di Ukrania.
E seremonia a konta ku partisipashon di 29 mandatario di paisnan aliado òf sosionan komersial, manera China i Brasil, pero tambe di Cuba, Venezuela, Kazajistán i Vietnam, ademas dje venezolano Nicolas Maduro.
E promé minister slovako, Robert Fico, tambe ta na Mosku, desafiando e liña di Union Europeo pa aislá Rusia for di despues ku Putin a lansa e ofensiva den Ukrania, den febrüari di 2022.
