MOSCOW, AP.- E dirigentenan di Rusia i Turkia a anunsiá djaluna ku lo establesé un zona desmilitarisá na Idlib, Siria, kual ta e último base di e rebeldenan i kaminda tin un ofensiva di parti di forsanan gubernamental.
E zona lo wòrdu establesé pa 15 di òktober i lo tin un profundidat di entre 15 pa 20 kilometer, segun e presidente ruso Vladimir Putin despues di un reunion di tres ora ku su kolega turko Recep Tayyip Erdogan.
“Mi ta di opinion ku e akuerdo aki ta evitá un krísis humanitario na Idlib”, asina Erdogan a señalá den un konferensia di prensa huntu ku Putin na Sochi, Rusia.
E provinsia di Idlib, kual ta keda na nortwèst di Siria, ta e último base di rebeldenan.
Moscow a deskribí Idlib komo un konsentrashon di terorismo i a bisa ku e gobièrnu sirio tin derechi di tuma kontròl den e region. Turkia a konsultá Rusia i Iran, su sosionan di negoshi, pa haña un solushon diplomátiko.
Putin a bisa ku e zona desmilitarisá lo wòrdu vigilá pa forsanan turko i polis militar ruso.
Idlib i alrededor di esaki tin mas di 3 mion sirio i mas o ménos 60.000 rebelde.
