MOSCOW, RUSIA, AFP.- Presidente ruso Vladimir Putin a duna e redadó, esta ‘whistleblower’ merikano Edward Snowden, siudadania ruso. Snowden, a eksponé e vigilansia masivo di National Security Agency (NSA) di Merka riba merikanonan i despues di esaki el a buska refugio na Rusia.
Un dekreto presidensial publiká djaluna a inkluí Snowden riba e lista nobo di siudadanonan ruso, na momentu ku e relashon entre Washington i Moscow ta na su punto mínimo, pa motibu di e konflikto na Ukrania.
E bosero di Kremlin, Dmitry Peskov, a bisa na agensianan di notisia ku Snowden a haña siudadania ruso despues ku el a entregá un petishon na aña 2020, pa fasilitá biahenan di idea i buèlta di su kasa merikano, Lindsay Mills.
E èks kontratista di 39 aña, a ‘leak’ dokumentonan sekreto na medionan di komunikashon na aña 2013, revelando ku NSA rekompilá kantidatnan grandi di datonan di komunikashon i otro informashonnan di siudadanonan merikano, violando nan derecho konstitushonal di privasidat.
E eksposishon di e programa sekreto di NSA a kondusí na leinan i reglanan ku ta prohibí e aktividat aki.
Snowden a entregá su solisitut pa bira siudadano ruso, pa fasilitá ku su famia por ta huntu. Pero el a bisa ku e ke mantené su nashonalidat merikano.
