MOSCOW, A.- E presidente ruso Vladimir Putin a ofresé su sosten firme na e mandatario venezolano Nicolás Maduro, kende a bishitá Moscow pa fortalesé asistensia polítiko i ekonómiko. Aktualmente su pais ta pasando den difikultat fuerte pa paga su debe di miónes di dòler ku Rusia.
Maduro ta kada biaha mas isolá di sobrá parti di mundu debí na e sanshonnan fuerte imponé pa Merka i Union Europeo. E mandatario ta wòrdu akusá di kier derotá institushonnan demokrátiko pa keda na poder na momentu ku su pais enfrentá un krísis ekonómiko i polítiko.
Putin a referí na e “situashon teribel ku ta persistí na Venezuela”, na komienso di su reunion.
Segun e skarsedat di medisina, un kantidat grandi di venezolano a hui pa Colombia i Brasil, nashonnan bisiña di Venezuela. E inflashon haltu por yega un mion porshento e aña aki, segun pronóstiko di Fondo Monetario Internashonal.
“Nos ta sostené su esfuersonan pa logra haña sosten den e sosiedat i un aserkamentu ku oposishon”, asina e gobernante ruso a deklará. “Nos a kondená kualkier akshon terorista, kualkier intento pa usa forma pa kambia e situashon”
Maduro a rospondé ku su gobièrnu a superá e desafionan konfrontá. El a agregá ku su gobièrnu a risibí diferente menasa i agreshon, pero a siña enfrentá esakinan. El a agregá ku su gobièrnu ta keda firme i ku e ta ganando.
E gobernante venezolano a afirmá ku e tin konfiansa ku e vínkulonan ekonómiko ku Rusia ta wòrdu ampliá.
Moscow ta un aliado polítiko importante di Venezuela i Rosneft, e kompania di petroli mas grandi na Rusia, ku invershonnan grandi den depósitonan di petroli den e pais suramerikano, kual su ekstrakshon ta disminuí tur luna.
